ಸಿಂಧನೂರು:ಸಮುದಾಯ ಆರೋಗ್ಯ ಕೇಂದ್ರ ತುರವಿಹಾಳದಲ್ಲಿ ದಿನಾಂಕ 06.08. 2026 ರಂದು ಗರ್ಭನಾಳ ಮರು ಜೋಡಣೆ ಶಸ್ತ್ರ ಚಿಕಿತ್ಸೆಯನ್ನು ಯಶಸ್ವಿಯಾಗಿ ಮಾಡಲಾಯಿತು. ಗರ್ಭನಾಳ ಮರು ಜೋಡಣಾ ಶಸ್ತ್ರ ಚಿಕಿತ್ಸೆಯನ್ನು ಮಾಡಿದ ಕರ್ನಾಟಕ ರಾಜ್ಯದ ಮೊಟ್ಟ ಮೊದಲ ಸಮುದಾಯ ಆರೋಗ್ಯ ಕೇಂದ್ರ ಇದಾಗಿದೆ.
ಗರ್ಭನಾಳ ಮರು ಜೋಡಣಾ ಶಸ್ತ್ರ ಚಿಕಿತ್ಸೆಯನ್ನು ಸಂತಾನಹರಣ ಶಸ್ತ್ರ ಚಿಕಿತ್ಸೆಯಾದ ನಂತರ ಒಂದು ಮಗುವಿದ್ದು ಮತ್ತೊಂದು ಮಗುವನ್ನು ಬಯಸಿದರೆ, ಮತ್ತು ಒಂದು ಮಗು ಇದ್ದು ಆ ಮಗು ತೀರಿ ಹೋಗಿ ಮತ್ತೊಂದು ಮಗುವನ್ನು ಪಡೆಯಲು ಇಚ್ಚಿಸಿದರೆ ಹಾಗೂ ವಿಧವೆಯಾಗಿದ್ದು ಮತ್ತೊಂದು ಮದುವೆಯಾಗಿದ್ದರೆ, ಅವರು ಮಗುವನ್ನು ಪಡೆಯಲು ಬಯಸಿದರೆ ಇಂತಹ ಸಂಧರ್ಭಗಳಲ್ಲಿ ಈ ಗರ್ಭನಾಳ ಮರು ಜೋಡಣೆ ಶಸ್ತ್ರ ಚಿಕಿತ್ಸೆಯನ್ನು ಮಾಡಲಾಗುತ್ತದೆ.
ಈ ಶಸ್ತ್ರ ಚಿಕಿತ್ಸೆಯನ್ನು ಮಾಡದೇ ಹೋದರೆ ಮಗುವನ್ನು ಪಡೆಯಲು ಕೃತಕ ಗರ್ಭಧಾರಣೆ (ಐ.ವಿ.ಎಫ್) ಗೆ ಮೊರೆಹೋಗ ಬೇಕಾಗುತ್ತದೆ. ಕೃತಕ ಗರ್ಭಧಾರಣೆಯಿಂದ ಮಗುವನನ್ನು ಪಡೆಯಲು 2-5 ಲಕ್ಷ ರೂಪಾಯಿಗಳ ವೆಚ್ಚ ತಗುಲುತ್ತದೆ. ಆದರೆ ಗರ್ಭನಾಳ ಶಸ್ತ್ರ ಚಿಕಿತ್ಸೆಯನ್ನು ಮಾಡುವದರಿಂದ ಸಹಜವಾಗಿ ಗರ್ಭ ಧರಿಸುವದರಿಂದ ಮಗುವನ್ನು ಪಡೆಯಬಹುದು. ಅಲ್ಲದೆ ಈ ಚಿಕಿತ್ಸೆಯನ್ನು ಖಾಸಗಿ ಆಸ್ಪತ್ರೆಯಲ್ಲಿ ಮಾಡಿಸಿದರೆ 1 ವರೆಯಿಂದ 2 ಲಕ್ಷ ವೆಚ್ಚ ತಗುಲುತ್ತದೆ.
ಆದರೆ ಗ್ರಾಮೀಣ ಭಾಗದ ಸಮುದಾಯ ಆರೋಗ್ಯ ಕೇಂದ್ರ ತುರವಿಹಾಳದಲ್ಲಿ ಗರ್ಭನಾಳ ಮರು ಜೋಡಣಾ ಶಸ್ತ್ರ ಚಿಕಿತ್ಸೆಯನ್ನು ಉಚಿತವಾಗಿ ಮಾಡಲಾಗಿದೆ. ಇದು ಜಿಲ್ಲೆಗೆ ಹೆಮ್ಮೆಯ ವಿಷಯವಾಗಿದೆ. ಗರ್ಭನಾಳ ಶಸ್ತ್ರ ಚಿಕಿತ್ಸೆಯನ್ನು ಡಾ ನಾಗರಾಜ ಪ್ರಸೂತಿ ಹಾಗೂ ಸ್ತ್ರೀ ರೋಗ ತಜ್ಞರು ನೆರವೇರಿಸಿದರು. ಈ ಸಂದರ್ಭದಲ್ಲಿ ಡಾ ಕೋನಿಕಾ ಅರವಳಿಕೆ ತಜ್ಞರು, ವಿರುಪಾಕ್ಷಪ್ಪ ಟಿ ವೈದ್ಯಾಧಿಕಾರಿಗಳು, ಶುಶೂಷಾಧಿಕಾರಿ ಮಮತ, ಹಸೀನಾ, ಹಾಗೂ ಡಿ ಗ್ರೂಪ್ ಸಿಬ್ಬಂದಿಗಳಾದ ಕ ಪೂಜಾ, ಬಸವರಾಜ ಮತ್ತು ಇತರೆ ಸಿಬ್ಬಂದಿಗಳು ಉಪಸ್ಥಿತರಿದ್ದರು.
ಕರ್ನಾಟಕದ ರಾಜ್ಯದಲ್ಲಿ ಮೊದಲ ಬಾರಿಗೆ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ಇಂತಹ ಸೂಕ್ಷ್ಮ ಮತ್ತು ವಿರಳ ಶಸ್ತ್ರ ಚಿಕಿತ್ಸೆಯನ್ನು ನಡೆಸಿದ ವೈದ್ಯ, ವೈದ್ಯಕೀಯ ತಂಡಕ್ಕೆ ಮಾನ್ಯ ಶಾಸಕರು ಆರ್ ಬಸನಗೌಡ ತುರವಿಹಾಳ ಇವರು ಸ್ವತಃ ಆಸ್ಪತ್ರೆಗೆ ಭೇಟಿ ನೀಡಿ ರೋಗಿಯ ಆರೋಗ್ಯವನ್ನು ವಿಚಾರಿಸಿ ವೈದ್ಯಕೀಯ ತಂಡವನ್ನು ಶ್ಲಾಘಿಸಿದರು. ಜಿಲ್ಲೆಯಲ್ಲಿ ಮೊದಲ ಬಾರಿಗೆ ಗ್ರಾಮೀಣ ಭಾಗದಲ್ಲಿ ಕ್ಲಿಷ್ಟಕರ ಶಸ್ತ್ರಚಿಕಿತ್ಸೆಯನ್ನು ಕೈಗೊಂಡ ಹಿನ್ನಲೆ ಕಲ್ಯಾಣ ಕರ್ನಾಟಕದ ಜಿಲ್ಲೆಗಳಲ್ಲಿ ಆರೋಗ್ಯ ಸೇವೆಗಳನ್ನು ಜನತೆಗೆ ಒದಗಿಸಿದ ಹೆಮ್ಮಿಯ ಪ್ರತಿಕವಾಗಿದೆ ಎಂದು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ ನಂದಿತಾ ಎಮ್‌ ಎನ್‌ ಸಂತಸ ವ್ಯಕ್ತಪಡಿಸಿದ್ದಾರೆ. ಜಿಲ್ಲೆಯ ಸಾರ್ವಜನಿಕರು ಪ್ರಶಂಸೆಯನ್ನು ವ್ಯಕ್ತಪಡಿಸಿದ್ದಾರೆ.
